Respýblıkalyq baıqaýǵa 18-30 jas aralyǵyndaǵy ánshiler qatysatyn bolady. Qatysýshylardyń óner kórsetý rettiligi aldyn-ala jerebe tańdaý arqyly anyqtalmaq.
Baıqaýdyń basty ereksheligi ánshilerge mınýsovkada bek-vokaldy qoldanýǵa ruqsat berilmeıdi. Konkýrstyń birinshi kezeńinde talapker erkin taqyryptaǵy ándi fonogrammamen (mınýs-1) oryndasa, II kezeńde Batyrhan Shókenovtiń ánin ınstrýmentaldy ansambldiń súıemeldeýimen aıtýy tıis. Qatysýshylardyń ónerin baǵalaıtyn qazylar alqasynyń quramynda belgili kásibı mýzykanttar, kompozıtorlar, óńdeýshiler men mádenıet jáne óner qaıratkerleri bolady. Reseıden tanymal mýzykanttar men belgili tulǵalar arnaıy qonaqqa kelmek.
Konkýrsty uıymdastyrýǵa Qyzylorda oblysy mádenıet, arhıvter jáne qujattama basqarmasy men «Tańdaý» prodıýserlik ortalyǵy kiristi.
«Al 18 mamyrda baıqaý úmitkerleriniń qatysýymen ashyq aspan astynda Batyrhan Shókenovty eske alýǵa arnalǵan Gala-konsert bolady. Dál osy kúni ánshige eskertkish qoıylyp, as beriledi. Sonymen qatar, ónerpazdar tal otyrǵyzyp, qalany kógaldandyrý jumysyna da at salysady. Baıqaý tuńǵysh ret 2016 jyly ótkizilip, oǵan 27 ónerpaz qatysqan edi» deıdi sharany uıymdastyrýshylar.
Aınash ESALI,
«Egemen Qazaqstan».
ALMATY
